2009-07-27

AI, TXORIA BANINTZ...



Ai, nire eskua zuhaitza balitz!
Ai, nire hatzak adaxkak balira!
Ai, nire ilea zure luma balitz!
Ai, zurekin hegan egin ahalko banu!


Hara, Andutz-etik behera topatu genuen habia. Patxixarrana (horrela deitzen diote kostaldean txolarreari) omen.

ANDUTZ

Mendiaren eta itsasoaren artean arrasto bat dago, batzuetan ttonttorrak jaiotzen dira arrasto horietan gora. Itziartik gora bada mendi bide zoragarri bat, haizeak eta urak elkarri eztarria bustitzen dioten lekuan. Inoiz egin al duzue froga? Garrasi egitea, ahalik eta ozenen. Andutz gainean botatako garrasia ito egiten da itsaso parera iristen denean, eta oihartzuna belauntzi bihurtzen. Andutz-610 metro. Ordu erdiko bidea. Ibilia luzatu nahi duenak (gu hala ibiltzen gara beti, tira eta tira), badu Saltsamendiraino joateko aukera, eta handik Lasturrera, eta handik Itziarra bueltan. Gu hala ibili ginen pasa den ostegunean. Auzo bitxia da Lastur; frontoia, taberna, aterpea, bi landaetxe, errota eta zezen plaza (kultur etxe bat ere bai?). Zezenketarik ez genuen ikusi, guk zezenak mendian ikustea dugu maite. Zezenkote ederra topatu genuen mendi bizkarrean etzanda. Mantso, otzan. Eskerrak!


Itziar inguruan

baldin bazaude zu,

paisaia barrenduko

zaizu zentzuz zentzu,

dena plazer iturri

dena koloretsu,

ANDUTZ-eko gailurra

igotzen badezu,

menditik itsasoa

goza dezakezu.
Zezenak postontzian muturra sartu eta irentsi ez badu, Ekaitzek egindako bertso eder hau topatuko duzue.

2009-07-23

ITZURUN

Huraxe da gure hondartza txokoa, beharbada itsasotik beste duelako menditik. Aurtengo lehenengo bisita asteartean egin genion. Baina, asteartekoa bisita berezia izan zen. Bi begi beltx-beltx izan zituen bisitari Itzurungo hondartzak. Bi begi beltx-beltxak Ouafa-renak dira. Ouafa marokoarra da eta hamabost urte ditu. Ouafa aitaren ikasle oiha da, askotan izaten dugu etxean bisitan. Ouafa gure laguna da! Ederki gozatu genuen Zumaiako olatuekin jolasean!

Ouafa eta Mohamed-en amona Atlas mendikatearen oinetan bizi da, eta noizbait hara bisitan eramango nauela esan dit. Egun hori noiz etorriko desiatzen nago.

IA-IA MARATOIA

Iritsi eta ziplo! Hiztegira joan eta nekearen esanahia zein den begira hasi naiz. Irakurtzen hasi baino lehen hiztegia itxi dut. Bai, gozoa da. Nekea ere gozoa da.


Igandean Garaioko parke naturalera hurbildu ginen, Gasteiza bidean Ozaetako irteeran atera eta bost bat minutura dago Garaioko urtegia. Urtean bizpahiru aldiz egiten diogu bisita. Igandeko asmoa, ordea, inoiz egin gabea: urtegiari itzulia ematea. 38 bat kilometro egin genituen oinez. Eta helmugan saria: urtegian bainotxo bat! Hura bai ederra!

IRAKURTUR

Liburu bat ukitzen duzunean


esku bat topatzen duzu,


liburu bat zabaltzen duzunean


begirada batek gozatzen zaitu,


liburu bat irakurtzen duzunean


lagun berriak egiten dituzu,


liburu bat aholkatzen duzunean


esku bat,


begirada bat,


lagun bat


oparitzen ari zara.


IRAKURTUR, atzo bertan martxan jarri genuen ekimena. Zirraragarria! Etxeko apaletan zeuden 16 liburu aukeratu eta kalera ateratzea erabaki dugu, herritarren eskura jartzeko. Atzo bertan Beasaingo txoko ezberdinetan jarri genituen liburuak, edonork lasai har ditzake, etxera eraman eta irakurri. Gozatu ostean, liburua hartutako toki berera itzultzea da baldintza bakarra. Literaturak bere ibilia egin dezan ea denon artean bidea marrazten diogun.
Hona hemen komunikabideetan azaldu den elkarrizketa egitasmoaren nondik norakoak eskurago izan ditzazuen.

2009-07-18

MADARIXA-ATTOLA-IZKITURRI-ERLO

Eutera irratsaioari hasiera eta amaiera ematen zion kantuarekin maitemindu egin ginen, eta maitasunak begirada zor duenez, zer hoberik kantuaren esentzia ezagutzea baino! Madarixa, Attola... onena bertara joatea!


Izarraitz mendigaina Azpeiti eta Azkoiti gainealdean dago, bere ttonttorrak: Kakueta, Xoxote, Erlo. Pozik egin nuen igoera, oraingo honetan Ekaitz ere animatu zelako. Bertsoa askoz hobea aterako zitzaidan Ekaitzen laguntzarekin, hori seguru! Hementxe Erloko postontzian zuen zain dagoen bertsoa:

Erlo gainari hirugarrenez

bota diogu enbido,

Madarixatik Attolan barna

gailurrera gara igo,

Izkiturriko uretan mihia

freskatu dugu eztiro,

beso zabalik hartzen gaituzu

etortzen garen aldiro,

uda bukatu baino lehenago

itzuliko naiz berriro.

URKIZU-ERNIOZABAL-ERNIO




Eta buelta! Joandako bideari pausoak bi aldiz marraztu behar zaizkiolako. Bide zoragarria. Lehendik Ernion izanak ginen, Alkizatik eta Errezildik. Beste bizkarralde bat ezagutu diogu oraingoan. Uztailaren 15ean egindako irteera. Goiz pasa bikaina! Erniozabal gainean ateratakoa da argazkia.

2009-07-13

EGIN APUSPTU ZURE BURUARI! (VII)



Noiztik ez diozu gutunik bidali udalekuetan ezagutu zenuen lagunari? Pentsa ezazu nolako ilusioa egingo dion postontzia zabaldu eta zuk bidalitako gutuna topatzeak! Une horrengatik bakarrik merezi du!



POSTARI MATEMATIKARIA edo MATEMATIKARI POSTARIA?

Sei pertsonari gutunak bidali nahi dizkiegu. Sei gutunak sei gutunazaletan sartu dira, zorian. Zen da bost gutun dagokien gutunazaletan, eta seigarrena okerreko gutunazalean egoteko probabilitatea?

PALOMARES

Atzo Palomaresen izan nintzen aitarekin. Palomares (1436m) Kantabriar mendikateko mendirik altuena da. Lagranen (Araba) hasi eta Lagranen bukatu genuen ibilia. Mendi zoragarria da, lehen ere izana nintzen hamabi urterekin, baina, orduko hartan nahiko pattal ibili nintzen eta banuen barruan atera beharreko arantzatxo bat. Atzoko igoeran gozatu egin genuen. Izugarri. Hauxe, ttonttor gainean dagoen mendiko botaren azpian utzi nuen olerkia.

Harkaitzaren indarra

majia,

harkaitzaren dstira

majia,

harkaitzaren bustia

majia.

Harkaitza

bi alde,

harkaitza

bi esku;

harkaitza

majia.


Hamabi urterekin hiru metro beherago laztandu zintudan, hogeita laurekin musu eman dizut bete-betean.


Kontua da azken zatia harritsua duela, eta aurreko igoaldian ez genuela punta bete-betean zapaldu. Atzo bai. Atzo plazer hutsa izan zen harkaitza besarkatzea.

LA CORNICHE


Uztailaren 9an itsasertzetik Hendaiatik Donibane Lohitzunera joan ginen aita, Ekaitz eta hirurok. La Corniche izenez da ezaguna bidea. Edonork egiteko modukoa. Ederra.


Eguna borobila izan zen Ziburuko hondartza galdu batean hartutako bustialdiarekin freskatu genuen eguerdia. Hendaia, Zokoa, Ziburu eta Donibane Lohitzune, gaur gertuago sentitzen dugu iparraldeko kostaldea.


Argazkian ibilbide erdialdean egindako geldialdia. Aitak atera zigun argazkia Ekaitz eta bioi. Egun pasa eder baten lekuko polita.

2009-07-07

BERIAIN-SAN DONATO

Unanuatik, Lizarragako tuneletik eta Ollotik abiatutako igoerak ezagunak genituen. Uharte-Arakildik abiatzen den igoera ezagutzea falta! Uztailaren 1ean heldu genion, ilusioz; nola bestela? 1002 metroko desnibela du Uharteko igoerak. Igoeraren zatirik handiena itzaletan , pagopean egiten da. Norberak hartzen dituenak salbu, atsedenaldirik ez du eskaintzen bideak; burugogorrak izan behar bideari neurria hartzeko! Agindu bezala puntaren-puntan dagoen postontzian utzi nuen bertsoa:

Uhartetikan San Donatora

gogotsu etorri gara,

izerdi ttntten freskotasuna

hasperenaren ufada,

eguzkiaren keinu beroa

haize ezaren balada,

tontor gainean neke osteko

plazerraren besarkada,

une hauekin bizitza bera

zinez ederragoa da!


Beriain, 1494m. Argazkilaria: Joxe Goikoetxea, aita.

Hantxe daukazue zain bertsoa. Inork erantzun nahi badio...

EGIN APUSTU ZURE BURUARI! (VI)

Zein ote da zenbakiek ezkutatzen duten misterioa? Ez dakit lo hartu ezin, eta askotan aritu ote zareten ardiak kontatzen. Oraintxe bat-batean bururatu zait, ea denbora gehiago nola pasako genukeen, batetik ehunera zenbatzen, edo ehunetik batera zenbatzen. Hartu erlojua eta egin apustu zure buruari!
1729-1729-1729-1729-1729
"Ramanujan matematikari indiarra bisitatzera joan zen Hardy goiz sargori batean. Elkarrizketari nola heldu asmatu ezinik zegoen Hardy eta zerbait esatearren ospitalera eraman zuen taxiaren zenbakia oso zozoa zela aipatu zion lagunari.
-Eta? Zein zenbakik ekarri zaitu ba ospitalera?
-1729ak. Zozoa benetan! Ez du ez gatz eta ez piperrik!
-Baina, nola esan dezakezu horrelakorik! - erantzun zion Ramanujanek berehala - zenbaki zoragarria da hori! Bi modu ezberdinetan bi kuboen batugai gisa adieraz daitekeen zenbakirik txikiena da! "
Hau da, "x ber 3 + y ber 3= 1729". x eta y; eta z eta r. Lau zenbaki topatu behar dituzue!
Leirek proposatutako problema da, kasualitatez nik neuk ere aste honetan bertan irakurri dut pasartea "El hombre anumérico" liburuan.
Leirek jarri zidan erronka eta nik topatu ditut lau zenbakiak, ea zuek ere topatzen dituzuen! Eta problemak proposatu nahi badituzue, ateak zabalik dituzue!