Itaka_Mikel Etxaburu_2017-1-14

Mikel liburuaren aurkezpen egunean

"Lo zaudela zabaldu dizkizut begiak" poema liburuaz solasean aritu zen Mikel Etxaburu urtarrilaren 14an Itakan. Ekaitz aritu zen gustura berarekin galde-erantzunean. Poema liburu ederra mintzagai hartuta hausnarketa-jolas zoragarriak izan zituzten hizpide. Begiak zabalik entzuteko moduko saioa; ez hartu lorik! 

Hiru hilabete

Elederren esku txiki jostaria_2017-1-28

HIRU. ESKUEN HILABETEA.

Airearekin bake-borrokan aritzen zara. Etorkizuna ukabilkadaka zulatzen duzu zure orain eta hemen misteriotsutik. Hanka-belaunekin arin-arina dantzatzen duzu, esku-besoekin flamenkoa. Eta dena da jai. Eta dena da festa. Dena biba fandango!

Zorionak, pottolo! Osaba Ekaitzek bertso bikaina oparitu dizu:

Eguzkiak ez ditu

itzalak behartzen

denboraz jabetzeko

denbora behar zen,

hasia zera zeure

buruaz ohartzen,

hatzak ezpain arteko

zulotxoan sartzen

ta eskura duzuna 

eskuetan hartzen.

Ama umearekin

Ama umearekin_Iñaki Bastarrika

Eskerrik asko, Iñaki Bastarrika, halako irudi ederra oparitzeagatik! Hitzak oparitu dizkiot nik marrazkiari:

Lepoaz beste egin didazu zure buruarekin

eta erdi bi naiz orain:

burua anitpodetan dut

eta buruaz beheragokoa hemen baina urrun. 

Hor nonbait da nire pentsamendua haizeak harrotua.

Eraztun bat izan ninteke zure konpromisoan

baina aho ireki bat baino ez naiz 

eta zu nire gosea.

Zilbor-hestea etetea ahaztu zitzaien emaginei,

horregatik doazkizu oinak nire bizkar hezurraz harago

horregatik zulatzen didazu egunero izerdia

horregatik da irribarre bat bion zauria. 

Baina burua buru truk

eta begiak atezuan.

Bi begi gorri eta bi urdin...

nahikoak munduaz ahaztu garela ohartzeko. 

Itaka_Juan Luis Zabala_2017-1-7

Juan Luis eta Txistu txakurra

Zaunka egin dio irratiari. Errealari gola sartu dioten unean zaunka egin dio irratiari. Radio Marcako esatariak hizketan jarraitu du txakurraren zaunkari entzungor. 

Zaunka egin dio parkeko zoko baztertuari; ijito errumaniar baten gorpua dago lurrean. Kale ertzeko zakarrontzian burua sartuta duen gizonak zerbaiten bila jarraitu du txakurraren zaunkari entzungor. 

Zaunka egin dio kulturari. Eta gero euskarari. Biak elkarri begira daude ispiluan. Zer gertatuko. Hala jarraitu dute luzaroan elkarren begi niniak janez txakurraren zaunkari entzungor. 

Zaunka egin dio bere buruari eta txistu hotsa entzun da. Isilik gelditu da txakurra bere zaunkei entzungor. Isilik gelditu da Txistu. 

Juan Luis Zabala kazetari eta idazlearekin solasean aritu ginen urtarrilaren 7an. "Txistu eta biok" liburuaz eta... gozo-gozo; gustura!

ETORKIZUNEKOON MEMORIA

Urriaren 28an munduratu zen Eleder. Bi hilabete eta erdiko memoria du, beraz. Nik, ordea, bederatzi hilabete atzera, urtarrilaren 28an jaio zela sentitzen dut. Ia urtebete darama niri, guri, naturari lotua. Ia urtebeteko memoria du, beraz. Memoria: berekiko eta inguratzen duenarekiko ezagutza. Urtebetez atzeragokoen jakintza poliki-poliki bere jakin-minetik eta ingurukook (familia, hezkuntza, lagunartea) kontatzen diogunetik jasoko du.

Honatx idatzi honen bueltan seme ttikiari begira otu zaizkidan galderak: noiz hasten gara historia izaten? Eta noiz hasten gara memoria izaten? Noiztik gara historiaren etorkizuneko erantzule? Zenbateko memoria du gutako bakoitzaren historiak?

Duela bi aste zenbait gazte bildu ginen Memoria Historikoaren inguruan elkarrekin lanean hasteko asmo-gogoz. Urteak daramatza Txinparta Elkarteak gai honen buelta-mamitan sekulako lana egiten. Baina, edozein arlotako elkartek duen kezka bera du. Nola inplikatu gazteak? Nola egin arduren transmisioa? Nola idatzi memoria etorkizunetik?

Dagoeneko hamar bat lagun bildu ditu Txinparta Memoria Gaztea Taldeak eta ideiak bor-borka ditu. Aukera eta protagonismoa emanez gero, gazteak badaki zer eta nola nahi duen.

Ez dut zalantzarik, etorkizuneko historian memoriak emango du zeresana eta izango du esateko zer. 

Euskalerria irratian entzungai: 
http://euskalerriairratia.eus/komunitatea/IratiGoikoetxea/1484669848926

BULARRA // BIBEROIA

Eleder eta Irati_2017-1-2

Barre pixka bat egin eta bere sinpletasunean hausnartzeko moduko egoera: 

Egongela batean Irati Elederri bularra ematen. Egongelan besteak beste hiru eta lau urteko bi neskatila daude, lehengusinak dira. Aho (eta begi) zabalik daude Iratiren bular beteari eta Elederren aho are beteagoari begira. Lau urteko neskatoak Elederren denbora bertsuko ahizpa du. Haren amak bizkarreko arazoak direla eta biberoia ematen dio alaba jaioberriari. 

Bat-batean lau urteko neskatilak (biberoia hartzen duen ahizpa jaioberria du) galdetzen dio hiru urteko lehengusinari (biberoia hartzen duen lehengusina jaioberria du): 

- Zergatik ez dio biberoia ematen?

Bizi eta ezagutu ez duenez, ziurrenik ez daki bularra eman esaten; bestela, akaso, zergatik ematen dio bularra? galdetuko bailuke. Honatx hiru urteko lehengusinaren erantzuna: 

- Eleder mutila delako. 

ITAKA_Anita Larrea_2016-12-31

Iñaki, Anita, Irati, Eleder eta Ekaitz ekainean egindako saioan

Abenduaren 30ean Anita Larrearen etxean izan ginen kontu kontari grabagailua hartuta. Ordu erdi pasatxoko solasaldia grabatu genuen garai bateko negu-gabon-urte zahar-berri gaiez. Eskerrik asko familia etxeko ateak zabaltzeagatik. Biharamuneko Itaka saioan entzungai izan genituen bezperan grabatutakoak. 

ITAKA_Koldo Zubeldia_2016-12-24

Abenduaren 24ko saioan Koldo Zubeldia poeta zaldibiarra hogeita hirugarrenez Itaka saioan izan genuen. Oraingo honetan Ekaitz aritu zitzaion gozo-gozo zirika, Koldok ederki eutsi zien hordagoei. Saio berean Iñaki Bastarrika Arestiz aritu zitzaigun.

ITAKA_Xabier Mendiguren_2016-12-17

Xabier Mendiguren Alsina liburuaren aurkezpenean

Abenduaren 17an Xabier Mendiguren idazle beasaindarrarekin aritu ginen solasean 2016an argitaratu zuen Alsina (Elkar) liburuaz.

ITAKA_Gurasoei gutuna_2016-12-10

Aurtengo lehiaketako kartela

Azaroaren 26an banatu ziren Gurasoei Gutuna IV. edizioko sariak. Abenduaren 10eko Itaka saioan Irati Goikoetxea helduen mailako irabazlearen hitzak, Kirmen Uribe eta Miriam Luki epaimahaikideen ekarpenak eta Itxaro Mendizabal antolatzailearen balorazio-solasaldia bildu genituen. Eskerrik asko, Itxaro, irratira bertaratu eta zure hitzetan eta hitzekin biluzteagatik!

ITAKA_Oihenart Aforismo lehiaketa_2016-12-3

Casado, Alberdi, Goikoetxea eta Otamendi_2016-12-2

Abenduaren 2an banatu ziren VI. Oihenart Aforismo lehiaketako sariak. Hurrengo egunean egin zen Itaka saioak bildu zituen lehiaketaren inguruko ahotsak. Ekaitz Goikoetxea eta Juan Ramon Alberdi sarituak, Antonio Casado antolatzailea eta Cristina Lasa epaimahaikidea aritu ziren solasean. Zorionak irabazle eta antolatzaileei!